ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᐅᓚᑦᑎᓂᒃᑯᑦ ᖃᓄᐃᓕᐅᓕᕐᒪᖔᑕ ᒫᑦᓯ 25, 2020
ᑲᖏᖅᖠᓂᖅ, ᓄᓇᕗᑦ – ᒫᑦᓯ 25, 2020, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑭᒡᒐᖅᑐᐃᔨᐅᖕᒪᑕ ᐱᔫᒥᒋᔭᐅᔪᓂᒃ ᑕᒪᐃᓐᓄᑦ ᐃᓄᖕᓄᑦ ᑭᕙᓪᓕᕐᒥᐅᑕᐅᔪᓄᑦ. ᓄᕙᒡᔪᐊᕐᓂᐊᓗᒃ COVID-19 ᓯᐊᒻᒪᒃᐸᓪᓕᐊᑎᓪᓗᒍ ᑲᓇᑕᒥ ᐊᒻᒪᓗ ᓄᓇᕐᔪᐊᕐᒥ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓯᕗᓪᓕᖅᐸᐅᑎᑦᑎᔪᑦ ᐋᓐᓂᐊᖁᔨᙱᓐᓂᕐᒧᑦ ᐊᑦᑕᓇᖅᑐᒦᖁᔨᙱᓐᓂᕐᒧᓪᓗ ᑭᕙᓪᓕᕐᒥᐅᓂᒃ. ᓄᓇᕗᑦ ᐊᕙᓗᓕᖅᑐᖅᓯᒪᙱᒻᒪᑦ ᐊᒃᑐᖅᑕᐅᑦᑕᐃᓕᔾᔪᑎᒥᒃ ᓄᓇᕗᒥᐅᓄᑦ ᓄᕙᒡᔪᐊᕐᓂᐅᔪᒃᑯᑦ ᐊᒻᒪᓗ ᒫᓐᓇᐅᔪᖅ ᐃᖢᐊᖅᓴᐅᑎᑕᖃᙱᒻᒪᑦ ᓴᐳᓐᓂᐊᖅᑕᐃᔾᔪᑎᒃᓴᒥᒃ ᐋᓐᓂᐊᓕᕈᑕᐅᔪᓐᓇᖅᑐᒃᑯᑦ ᑕᐃᒪᓐᓇ. ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᔭᐅᖅᑐᐃᔪᑦ ᑭᕙᓪᓕᕐᒥᐅᓂᒃ ᓈᓚᖁᑉᓗᒋᑦ ᐊᒻᒪᓗ ᒪᓕᑦᑎᐊᖁᑉᓗᒋᑦ ᐃᒪᓐᓈᖅᑐᕈᑕᐅᔪᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᙶᖅᑐᓂᒃ ᐅᖓᓯᒌᒍᑎᖃᑦᑕᕆᐊᖃᕐᓂᕐᒧᑦ ᐃᓅᖄᑎᒋᔭᒃᑯᑦ, ᐃᓄᖕᓃᑦᑕᐃᓕᔭᕆᐊᖃᕐᓂᕐᒧᑦ, ᐊᒻᒪᓗ ᐊᒡᒐᐃᑦ ᐃᕐᒥᖃᑦᑕᕆᐊᖃᕐᓂᖏᓐᓄᑦ.
ᐱᓇᓱᐊᕈᓯᐅᓚᐅᖅᑐᒥ, ᒥᓂᔅᑕ ᔪᐊᔾᔨ Hᐃᒃᔅ ᓄᓇᕗᑦ ᒐᕙᒪᒃᑯᖏᓐᓄᑦ ᓇᓗᓇᐃᖅᓯᓚᐅᖅᑐᖅ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑐᐊᕕᕐᓇᖅᑐᖃᕐᓂᖏᓐᓄᑦ. ᐃᒪᓐᓇ ᑐᑭᖃᖅᑐᖅ ᑕᒪᕐᒥᒃ ᐃᓄᐃᑦ ᑲᑎᑦᑕᐃᓕᔭᕆᐊᖃᖃᑦᑕᕐᓂᖏᓐᓄᑦ. ᓄᓇᕗᑦ ᒐᕙᒪᒃᑯᖏᓐᓄᑦ ᓴᓇᔨᒋᔭᐅᔪᑦ ᐊᖏᕐᕋᒥ ᓴᓇᔪᓐᓇᖅᑐᑦ ᐊᖏᕐᕋᒥᓂᒃ ᓴᓇᖃᑦᑕᕆᐊᓖᑦ ᖃᖓ ᓴᓇᕝᕕᖕᒥᓄᑦ ᐅᑎᕈᓐᓇᖅᓯᔪᒫᕐᓂᖏᑦ ᓇᓗᓇᐃᖅᑕᐅᖅᑳᖅᑎᓐᓇᒍ. ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖅ, ᐃᖢᐊᖅᓴᐃᔨ ᒪᐃᑯ ᐸᑐᓴᓐ, ᐊᑐᓕᖁᔨᓯᒪᖕᒥᔪᖅ ᑕᒪᕐᒥᒃ ᐃᓕᓐᓂᐊᕐᕖᑦ ᐊᒻᒪᓗ ᐸᐃᕆᕝᕖᑦ ᒪᑐᔭᐅᓯᒪᖁᑉᓗᒋᑦ ᐱᖓᓱᓂᒡᓘᓐᓃᑦ ᐱᓇᓱᐊᕈᓯᕐᓂᒃ. ᑕᒡᕙᓂ ᐱᓇᓱᐊᕈᓯᕐᒥ, ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖅ ᐃᒪᓐᓈᖅᓯᓚᐅᖅᑐᖅ ᓄᖅᑲᖅᑎᑦᑎᓯᒪᑉᓗᓂ ᑕᒪᐃᓐᓂᖅᑲᔭᖅ ᑎᑭᖃᑦᑕᖅᑐᓂᒃ ᓄᓇᕗᒧᑦ. “ᓄᓇᖃᖅᑐᑦ ᓇᓗᓇᐃᒃᑯᑕᕐᒥᒃ ᑐᓂᓯᖃᑦᑕᕆᐊᖃᕐᓂᐊᖅᑐᑦ ᓄᓇᖃᓪᓚᑦᑖᕐᓂᕐᒥᓄᑦ ᓄᓇᕗᒧᑦ ᑎᑭᓐᓂᐊᕈᑎᒃ ᑎᖕᒥᓲᒃᑯᑦ. ᑎᖕᒥᓲᕐᒧᑦ ᐃᑭᖅᑳᕐᓇᑎᓂᒃ ᓄᓇᕗᑦᒧᙵᐅᔪᒧᑦ, 14-ᓂᒃ ᐅᑉᓗᓂᒃ ᐊᓂᑦᑕᐃᓕᒪᑎᑕᐅᖅᑳᕆᐊᖃᖃᑦᑕᕐᓂᐊᖅᑐᑦ ᐊᑐᕚᒦᑦᑐᑦ, ᐅᐃᓂᐲᒃᒦᑦᑐᑦ, ᐃᐊᑦᒪᓐᑕᓐᒦᑦᑐᑦ ᐅᕝᕙᓘᓐᓃᑦ ᔭᓗᓇᐃᒦᑦᑐᑦ. 14 ᐅᑉᓗᑦ ᐱᓂᒃᑳᖓᑕ, ᐋᓐᓂᐊᙱᓐᓂᕋᖅᑕᐅᔪᑦ ᓇᓗᓇᐃᖅᑕᐅᖃᑦᑕᕐᓂᐊᑐᑦ ᐊᒻᒪᓗ ᐅᑎᕈᓐᓇᖅᑎᑕᐅᓗᑎᒃ ᓄᓇᒥᓄᑦ. ᑕᒪᓐᓇ ᐃᓚᐅᖃᑕᐅᑎᑦᑎᔪᖅ ᐋᓐᓂᐊᕐᕕᓕᐊᖅᓯᒪᔪᓂᒃ. ᑐᔪᕐᒥᕕᖃᖅᑎᑕᐅᓗᑎᒃ, ᓂᕆᔾᔪᑎᑖᖅᓯᒪᓗᑎᒃ ᐊᒻᒪᓗ ᐊᑐᕆᐊᖃᖅᑕᖏᓐᓂᒃ ᐱᓯᒪᑎᑕᐅᖃᑦᑕᕐᓂᐊᖅᑐᑦ ᑕᒪᕐᒥᒃ ᐊᐅᓪᓚᖅᓯᒪᔪᑦ ᐃᓄᖕᓃᑦᑕᐃᓕᒪᑎᑕᐅᑎᓪᓗᒋᑦ. ᐊᒻᒪᓗᑦᑕᐅᖅ, ᑕᒪᕐᒥᒃ ᐃᓄᐃᑦ ᐊᑕᐅᓯᕐᒧᑦ ᑲᑎᑦᑕᐃᓕᒪᑎᑕᐅᓕᖅᑐᑦ.”
ᓄᓇᕗᑦ ᑐᙵᕕᒃᑯᑦ ᑎᒥᖓᑕ ᑎᑎᕋᕐᕕᖏᑦ ᒪᑐᓯᒪᓕᖅᑐᑦ ᐊᒻᒪᓗ ᐊᖏᕐᕋᒥᓂᒃ ᓴᓇᑎᑕᐅᓕᖅᑐᑦ. ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᒪᑐᓯᓯᒪᓕᕐᒥᔪᑦ ᑎᑎᕋᕐᕕᖕᒥᓂᒃ ᐊᒻᒪᓗ ᓄᖅᑲᖓᑎᑦᑎᔪᑦ ᐃᑲᔫᑏᓂᒃ ᐱᔨᑦᓯᕋᖅᑕᐅᔾᔪᑎᓂᒡᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑎᒍᑦ ᐊᐃᕆᓕ 6-ᒧᑦ ᑎᑭᓪᓗᒍ 8:30-ᒧᑦ ᐅᑉᓛᒃᑯᑦ. ᑕᒪᕐᒥᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓴᓇᔨᖏᑦ ᐊᖏᕐᕋᒥ ᓴᓇᑎᑕᐅᓕᖅᑐᑦ. ᐃᓚᐃᖅᑐᓄᑦ ᖁᓚᕆᔭᖃᖅᑐᓄᓪᓗ ᐃᑲᔫᑎᓕᕆᔨ ᐊᒻᒪᓗ ᐃᓕᓐᓂᐊᖅᑐᓄᑦ ᐃᑲᔫᑎᓕᕆᔨᒃᑯᑦ ᑲᔪᓰᓐᓇᕆᐊᓖᑦ.
| ᐃᑲᔫᑎᑦ/ᐱᔨᑦᓯᕋᖅᑕᐅᔾᔪᑏᑦ | ᐅᖃᓘᑖ | ᖃᕆᑕᐅᔭᒃᑯᑦ ᑐᕌᕈᑎᖓ |
| ᐃᓚᐃᖅᑐᓄᑦ ᖁᓚᕆᔭᖃᖅᑐᓄᑦ ᑲᒪᔨ | (867) 645-6832 | cpilakapsi@kivalliqinuit.ca |
| ᐃᓕᓐᓂᐊᖅᑐᓄᑦ ᐃᑲᔫᑎ* | (867) 645-6830 | nonalik@kivalliqinuit.ca |
| ᐊᓯᖏᓐᓄᑦ ᑐᑭᓯᒋᐊᕈᑎᒃᓴᓄᑦ | (867) 645-5725 ᐅᕝᕙᓘᓐᓃᑦ
1-800 220-6581 |
info@kivalliqinuit.ca |
*ᐊᖏᕐᕋᒥ ᕿᒪᐃᓯᒪᑉᓗᓂ ᐃᑲᔫᑎᑖᕈᑎ ᑲᔪᓰᓐᓇᕐᓂᐊᖅᑐᖅ ᐊᑭᓕᖅᑑᑕᐅᓗᓂ ᐃᓕᓐᓂᐊᖅᑐᓄᑦ ᐊᖏᕐᕋᒥᓃᙱᑦᑐᓄᑦ.
ᐱᒋᐊᕐᓗᒍ ᒫᑦᓯ 19-ᒥ, ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᐊᖏᕐᕋᐅᑎᑦᑎᓚᐅᖅᑐᑦ ᑕᒪᐃᓐᓂᒃ ᑭᕙᓪᓕᕐᒥᐅᑕᓂᒃ ᑕᓯᕐᔪᐊᕐᒥ ᐊᐳᖅᑎᓐᓈᖅᑐᒥᓗ ᐅᔭᕋᖕᓂᐊᕐᕕᖕᓂᒃ ᐱᓕᕆᔪᓂᒃ ᐊᒻᒪᓗ ᐅᔭᕋᒃᓯᐅᖅᑎᐅᔪᓂᒃ ᐊᖏᕐᕋᐅᒪᑎᑦᑎᓂᐊᖅᖢᑎᒃ ᓯᑕᒪᓂᒃ ᐱᓇᓱᐊᕈᓯᕐᓂᒃ. ᒪᓕᒃᖢᒍ ᐊᒡᓂᒍ ᐃᒍᒃᑯᑦ ᑐᓴᒐᒃᓴᓕᐊᕆᓯᒪᔭᖓ: “ᑕᒪᕐᒥᒃ ᓄᓇᕗᒥᐅᑕᑦ ᓴᓇᔩᑦ ᒫᓐᓇᐅᔪᖅ ᐅᔭᕋᖕᓂᐊᕐᕕᖕᒦᑦᑐᑦ ᐊᖏᕐᕋᐅᑎᑕᐅᓂᐊᖅᑐᑦ ᐊᒻᒪᓗ ᑕᐃᑉᑯᐊ ᐅᔭᕋᖕᓂᐊᕐᕕᖕᒦᙱᑦᑐᑦ ᐅᑎᔾᔮᙱᑦᑐᑦ. ᑖᑉᑯᐊ ᓴᓇᔩᑦ ᑮᓇᐅᔭᓕᐅᑐᐃᓐᓇᕐᓂᐊᖅᑐᑦ ᓴᓇᙱᒃᑲᓗᐊᕐᓗᑎᒃ. ᐊᒻᒪᓗᑦᑕᐅᖅ, ᐊᒡᓂᒍ ᐃᒍᒃᑯᑦ ᑲᑎᒪᖃᑎᖃᕐᓂᐊᖅᑐᑦ ᓄᓇᕗᒥ ᑳᓐᑐᕌᒃᑎᒥᓂᒃ ᐅᖃᐅᓯᖃᕈᓐᓇᖁᑉᓗᒋᑦ ᑕᐃᒪᓐᓇᕐᓚᒃ ᖃᓄᐃᓕᐅᕈᑕᐅᓂᐊᖅᑐᓂᒃ ᐱᔾᔪᑎᒋᑉᓗᒋᑦ ᓄᓇᕗᒥᐅᑦ ᓴᓇᔨᖏᑦ.” ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐃᑲᔪᖅᑐᐃᔪᑦ ᑕᐃᒪᓐᓇᕐᓚᒃ ᐅᔾᔨᖅᑐᕆᐊᖃᕐᓂᖏᓐᓄᑦ ᓄᓇᕗᒥ ᑳᓐᑐᕌᒃᑏᑦ ᐃᓄᖕᓂᒃ ᓴᓇᔨᖃᖅᑐᑦ ᓯᐊᒻᒪᒃᐸᓪᓕᐊᖁᓇᒍ ᓄᕙᒡᔪᐊᕐᓂᐅᔪᖅ. ᒫᑦᓯ 24-ᒥ, ᐊᒡᓂᒍ ᐃᒍᒃᑯᑦ ᐱᓕᕆᐊᒥᓂᒃ ᖃᑉᓰᓐᓇᕈᖅᑎᑦᑎᓂᐊᖅᑐᑦ ᑕᓯᕐᔪᐊᕐᒥ ᐊᒻᒪᓗ ᐊᐳᖅᑎᓐᓈᖅᑐᒥ ᐊᐅᓚᑕᐅᔪᓂᒃ ᖃᐅᔨᓴᖃᑦᑕᕐᓗᑎᒡᓗ ᖃᓄᐃᓕᐅᕈᑕᐅᔪᓐᓇᕋᔭᖅᑐᓂᒃ ᑲᔪᓯᔪᓐᓇᖁᑉᓗᒋᑦ ᑭᒡᓕᖃᖅᑐᒃᑯᑦ ᓄᓇᐅᑉ ᐊᑖᓂ ᐱᓕᕆᐊᑦ ᐊᒻᒪᓗ ᐅᔭᕋᓕᕆᔾᔪᑏᑦ. ᒪᓕᒃᖢᒍ ᐊᒡᓂᒍ ᐃᒍᒃᑯᑦ ᑐᓴᒐᒃᓴᓕᐊᖓ: “ᑕᒪᒃᑯᐊ ᐱᓕᕆᐊᖑᓲᑦ ᑕᒪᐃᓐᓂᒃ ᓄᓇᕗᒥ ᐅᔭᕋᖕᓂᐊᕐᕕᖕᓂᒃ, ᓂᕆᐅᒋᔭᐅᔪᑦ ᑲᒻᐸᓂᐅᔪᒃᑯᑦ ᐊᖑᒻᒪᑎᑎᑦᑎᔪᓐᓇᕐᓂᐊᕐᒪᑕ ᐅᓗᕆᐊᓇᖅᑐᖃᙱᑦᑐᒃᑯᑦ ᐊᐅᓚᑦᑎᔾᔪᑎᒋᕙᒃᑕᖏᓐᓄᑦ ᑕᒪᕐᒥᒃ ᒪᓕᒃᑕᐅᔭᕆᐊᓖᑦ ᓴᑉᑯᑕᐅᒃᐸᑕ. ᐊᒃᑐᖅᑕᐅᓂᓖᑦ ᓴᓇᔩᑦ ᑮᓇᐅᔭᓕᐅᖏᓐᓇᕐᓂᐊᖅᑐᑦ ᐊᐃᕆᓕ 13, 2020-ᒧᑦ.” ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐊᒡᓂᒍ ᐃᒍᒃᑯᑦ ᓯᕗᓕᖅᑎᖏᓐᓂᒃ ᐊᒻᒪᓗ ᐊᖓᔪᖅᑳᒡᒍᑎᖏᓐᓂᒃ ᓄᓇᒋᔭᖅᐳᑦ ᐊᑦᑕᓇᖅᑐᖅᑖᖁᓇᒋᑦ ᐊᒻᒪᓗ ᑕᒪᕐᒥᒃ ᐊᒡᓂᒍ ᐃᒍᒃᑯᑦ ᓴᓇᔨᖏᑦ ᐊᒻᒪᓗ ᑳᓐᑐᕌᒃᑎᖏᑦᑕ ᓴᓇᔨᖏᑦ ᐅᔾᔨᖅᑐᖁᑉᓗᒋᑦ ᐃᖕᒥᓂᒃ ᓴᐳᓐᓂᐊᕆᐊᖃᕐᓂᕐᒧᑦ ᐊᒻᒪᓗ ᑕᐃᑉᑯᐊ ᐋᓐᓂᐊᖅᓴᕋᐃᑦᑐᑦ ᐃᓅᖃᑎᑉᑎᓐᓂᒃ.
ᒫᓐᓇᐅᔪᖅ ᓄᓇᕗᒥ ᓇᓗᓇᐃᖅᑕᐅᓯᒪᔪᖃᙱᑎᓪᓗᒍ ᓄᕙᒡᔪᐊᖅᑐᒥᒃ ᑕᒪᒃᑯᐊ ᑕᒡᕙ ᐅᔾᔨᖅᑐᕈᑏᑦ.
ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑎᒍᓯᓯᒪᓕᖅᑐᑦ ᓄᓇᕗᑦ ᒐᕙᒪᒃᑯᖏᑦᑕ, ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑐᐊᕕᕐᓇᖅᑐᒃᑯᑦ ᑭᐅᔾᔪᑎᖓᓂᒃ ᐸᕐᓇᐅᑎᒥᒃ. ᑕᒪᓐᓇ ᐸᕐᓇᐅᑎ ᓇᓗᓇᐃᔭᐃᓯᒪᔪᖅ ᐱᓕᕆᐊᒃᓴᕆᔭᐅᔪᓂᒃ ᓄᓇᕗᑦ ᒐᕙᒪᒃᑯᖏᑦᑕ ᐱᓕᕆᕝᕕᖏᓐᓄᑦ ᐊᒻᒪᓗ ᓴᓇᔨᖏᓐᓄᑦ. ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᒫᓐᓇᐅᔪᖅ ᕿᒥᕐᕈᔪᑦ ᑖᑉᓱᒥᙵ ᑎᑎᕋᖅᓯᒪᔪᒥᒃ.
ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐃᒪᓐᓇᐃᑦᑐᑦ “ᑎᓕᔭᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖑᑉᓗᑎᒃ”, ᑭᒡᒐᖅᑐᐃᔨᐅᔪᑦ ᐱᔫᒥᒋᔭᐅᔪᓂᒃ ᑕᒪᐃᓐᓄᑦ ᐃᓄᖕᓄᑦ ᑭᕙᓪᓕᕐᒥ, ᐊᔭᐅᖅᑐᐃᔨᐅᔪᑦ, ᐊᐅᓚᑦᑎᔨᐅᔪᑦ ᐊᒻᒪᓗ ᕿᒥᕐᕈᔨᐅᔪᑦ ᐃᓚᖏᓐᓂᒃ ᓄᓇᕗᒥ ᑭᖑᓪᓕᖅᐹᒃᑯᑦ ᐊᖏᕈᑎᓕᐊᖑᓯᒪᔪᒥᒃ ᑭᕙᓪᓕᕐᒧᑦ ᑐᕌᖓᔪᓂᒃ. ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑐᕌᒐᕆᔭᖓ ᐃᒪᓐᓇᐃᑦᑐᖅ ᑭᒡᒐᖅᑐᐃᓂᐊᕐᓗᓂ, ᐊᔾᔨᒌᒃᑎᑦᑎᓂᒃᑯᑦ ᐊᒻᒪᓗ ᐋᖅᑭᐅᒪᔪᒃᑯᑦ, ᐃᓄᖕᓂᒃ ᑭᕙᓪᓕᕐᒥ ᐱᕙᓪᓕᐊᑎᑦᑎᓂᒃᑯᑦ, ᓴᐳᓐᓂᐊᕐᓂᒃᑯᑦ, ᐊᐅᓚᑦᑎᓂᒃᑯᑦ ᐊᒻᒪᓗ ᖁᕝᕙᖅᑎᕆᓂᒃᑯᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᑲᔫᑎᖏᓐᓂᒃ ᓄᓇᖃᖅᑳᖅᑑᑉᓗᑎᒃ; ᐊᒻᒪᓗᑦᑕᐅᖅ ᖁᕝᕙᖅᑎᕆᓂᒃᑯᑦ ᑮᓇᐅᔾᔭᒃᓴᕈᑎᒃᓴᓂᒃ, ᐃᓅᖃᑎᒌᒍᑎᒃᓴᓂᒃ, ᒐᕙᒪᓕᕆᔾᔪᑎᓂᒃ ᐊᒻᒪᓗ ᐃᓕᖅᑯᓯᑐᖃᑎᒍᑦ ᖃᓄᐃᙱᑦᑐᓐᓇᕐᓂᕐᒧᑦ ᑭᖑᕚᕆᓂᐊᖅᑕᒃᑯᑦ.